الأربعاء، 13 فبراير 2008

ريهام

صباح الخير يا ريهام .. يارهومة وحشتينى اوى اوى اوى .... انا كمان عارفه انى وحشتك .... عارفه امبارح طول الليل سهرانة مش عارفه ليه كل ذكرياتنا واحنا صغيرين عدت عليا ..... فاكره ياريهام اول يوم تروحى في الجامعة معايا كنتى ماسكة في ايديا اوى زى طفل صغير ماسك في ايد مامته وخايف يتوه في الزحمة وكل اصحابنا ضحكو عليكى وانتى زعلتى ... طيب خلاص ياستى انا اسفة بلاش دى .. طيب بجد فاكره عمر المكوجى اللى كنتى بتشترى له كل انواع الشكولاتة الفاخرة ولما اسألك تقولى هو انا عندى اغلى من عمر ... فاكرة لما ماما خرجت وعملت انا وانتى اللحمة الباردة وزودنا فيها الثوم اوى اوى لاننا كنا بنحبه وفوجئنا باللحمة( اللى كنا عاملينها مفاجأة لماما لما ترجع عشان تفرح بينا اننا طبخنا لوحدنا ) طعمها مر جدا وماما رمتها .... تصدقي كانت احلى ايام ... الواحد مش حس بيها غير لما اتجوز وراح بيت تانى .... عارفه يارهومة وانا في بيتى لوحدى بسمع اغانى انغام بحس انها انتى صوتك زيها بالظبط .... بس تعرفي انا حاسه انك الحمد لله احسن كتير من الاول واكيد دلوقتى مش حاسه بالالام الرهيبة اللى كنتى بتحسيها ..... فاكره لما كنتى بتشبهى نفسك بالعروسة baby born لما شعرك وقع من العلاج... طول عمرك دمك زى العسل حتى وانتى تعبانة ... حتى اصحابنا كلهم بيسألو عليكى مفتقدينك اوى . حاضر هاوصلهم سلامك ... بس بجد انتى وحشانى اوى انا عارفه انك زعلانة ومش عاوزانى امشي دلوقتى ولا انا والله بس اعمل ايه كلهم بيقولو يلا امشي الليل داخل وحرام تقعدى في المقابر في الوقت دا ... والله ما انا عارفه كلامهم دا صح ولا غلط .... بس مضطرة اسمعه ...خلى بالك من نفسك ... وهاتوحشينى اوى

هناك 11 تعليقًا:

جميز يقول...

اتمنى ان يصل كلامك اليها , و ان كنت أعتقد بذلك , فأرواح من نحب تهيم حولنا

تحياتى

موناليزا يقول...

تحتاج دعائك اكتر وموعدكم تحت ظل عرش الرحمن يوم العرض العظيم حينما ينادى اين المتحابون فى لأظلهم فى ظلى فى يوم لا ظل فيه الا ظلى
================
ممكن تشيلى تاكيد الكلمة حين ارسال التعليق

رئـــــيسـة حزب الأحلام يقول...

ربنا يوفقك
تحياتى

واحد بيدور علي قلبه يقول...

في ناس بتقول ان الكلام دا بيوصل للي بيسمعه بس بجد ربنا يرحمه ويلحقنا بيها علي احسن حال ويغفر لها وجميل انك حسه بكل دا معاها.

محاولات مخنوقة يقول...

ميرسي اوى monaliza ورئـــــيسـة حزب الأحلام و واحد بيدور علي قلبه لتشريفكم مدونتى وتعليقكم بجد كنت يأست ان حد ممكن يقراها مع انه مهم اوى بالنسبة لى ان كل الناس تشوفها حقيقي ميرسي على كلماتكم

فاتيما يقول...

محاولات مخنوقة
إنتى خنقتى قلبى بالبوست دا
عارفة ليه ؟؟
عشان فكرتنى بصديقة كانت جارة العمر و زميلة دراسة و إتخطفت من قلبى فى عز الشباب أيام الجامعة ...
كانت قمر و لما كنت أشوفها جاية عليا أحس إنها قمة الحيوية و الشباب بجد
إتخطفت غدر بعد كتب كتابها هيا و عريسها فى حادثة عربية
كرهت راس البر
و سواقة العربيات
و بيتنا القديم
و التكيفيات اللى كنا بنفعد عليها فى الجامعة و أشوفها جايلى ناحيتها عشان تسلم عليا
موش عارفة أقولك إيه
ربنا يصبرك
هيا اكيد سمعاكى
أنا متاكدة
الملايكة هتوصل سلامك و إشتياقك
أنا بقول ليوسف إبنى كدا
و أنا عارفة إنى صح
موش عشان عارفة الحقيقة
لأ
عشان عندى حسن ظن قوى فى ربنا
تحياتى يا عزيزتى

محاولات مخنوقة يقول...

فاتيما ميرسي على تعليقك واللى فعلا اكد عندى نفس الاحساس اللى عندك ان الملايكة هاتوصل لها ودايما يا فاتيما عندى احساس انها هى كمان حاسه بيا وبافتقادى لها .. ربنايرحمها هى وصاحبتك وجوزها والحاجة الوحيدة اللى بتصبرنى طبعا بعد ايمانى بان دا امر ربنا وقضاءه هو انى حاسه انها اكيد احسن وارتاحت من اّلامها وانها ان شاء الله عند ربنا من الصابرين لانها بالفعل صبرت على مرضها وشافت شبابها وجكالها بيذبل ومع ذلك كلمة الحمد لله لم تكن تفارق شفتيها .. ميرسي اوى فاتيما انك دخلتى مدونتى ودا شئ اسعدنى جدا

nonni يقول...

حقيقى مش عارفة ابطل عياط اد ايه اثرتى فيه حقيقى البوست رائع و ربنا يصبرك يارب و ادعيلها كتير



تحياتى

محاولات مخنوقة يقول...

ميرسي نونى على تعاطفك وعلى روحك ومشاعرك الرقيقة ونورتى مدونتى المتواضعة وان شاء الله انا هتابع مدونتك باستمرار

blue-wave يقول...

انتى عامله مدونتين علشان بس توصلى الرساله دى لريهام؟؟؟؟
يارب تكون الرساله وصلت لحسن دى كدا بقالها كتير اوى من فبراير لنوفمبر
اتمنى تنورينى فى مدونتى

محاولات مخنوقة يقول...

blue_wave ميرسي جدا لتشريفك مدونتى
يمكن عندك حق انى مش بكتب حاجة بس دا مش لانى مش عندى حاجة اقولها بالعكس اللى عندى كتييييييييير اوى
بس كتير الحزن بيخنق ويكتف ويخلى الانسان حتى مش قادر يكتب بس اوعدك انى اكتب ووعد المره اللى جاية لما تدخل هنا هتلاقي بوستات جديدة